ANPA Titongo

Dende ANPA TITONGO queremos darvos a benvida a este novo curso a todas as familias, tanto ás que veñen por primeira vez á Escola Infantil Monte Alto, como ás que continúan con nós.

Aproveitamos para presentarnos. Somos a asociación de nais e pais de alumnos/as e a nosa función é completar con iniciativas útiles o traballo que se fai dende a Escola para ofrecer aos nosos nenos e nenas o mellor nesta etapa educativa. Ademais, tamén servimos de canle para representar e dar voz ás familias para que se teñan en conta as nosas opinións nas administracións implicadas nas decisións sobre a nosa Escola.

Como en cursos anteriores, este curso están previstas as seguintes accións:

● MÚSICA. Levamos anos contando con Félix Arias, educador, compositor e músico da nosa cidade, que ademais da actividade semanal está moi implicado en todos os proxectos da Escola. O obxectivo das sesións é familiarizar ás nenas e nenos co mundo da música (instrumentos, ritmos, bailes, cancións…) para estimular o seu desenvolvemento integral. Está dirixida a todo o alumnado do centro, realizándose dúas sesións semanais, unha con cada grupo de idade dentro do horario escolar.

● LAVANDARÍA. Desde o curso 2019-2020 iniciouse a contratación dun servizo de lavandaría para toda a roupa que empregan os nenos e nenas na Escola a diario e a ANPA asume este gasto. Deste xeito non renunciamos aos beneficios de usar os mandilóns e babeiros de maneira compartida, igualitaria e sempre dispoñible, sen ter que encargarnos as familias da limpeza. Este servizo cobra especial relevancia e utilidade para as familias que fan uso do comedor.

● COLABORACIÓN COA ESCOLA. Colaboramos coa Escola en todo o que sexa oportuno, como por exemplo apoio en festas e saídas, realización de propostas para actividades complementarias, compra de materiais extra, etc. Sabemos que o equipo educativo está sempre atento a novos e mellores xeitos de educar ás nosas fillas e fillos, por iso estamos en continua comunicación para dar o soporte que podamos ofrecer.

A ANPA TITONGO financia estas actividades co apoio das familias, e para que vexades que é necesario a colaboración de todas, os gastos fixos que vos comentamos para este curso serían os seguintes:

– A actividade de música custa 140€/mes (1.300€/curso).
– A lavandaría depende dos lavados que se fagan, pero supón ao redor de 55€/mes (600€/curso).

As vías de financiación polo momento son estas:

• COTA ANUAL: Cada familia da Escola pode facerse socia por un importe de 60€/curso (80€/curso para aquelas familias que teñan mais dunha crianza na Escola este curso).
• LOTARÍA DE NADAL: Véndese desde finais de outubro Lotaría de Nadal mediante participacións de 5€ (xóganse 4€ no sorteo e apórtase un donativo de 1€).
• MERCADIÑO DE NADAL: Recollemos doazóns de xoguetes e contos para despois poñelos á venda a prezos moi populares (entre 1€ e 5€). Todo o que sobre será doado a entidades sociais. O mercadiño soe facerse nas dúas primeiras semanas de decembro.  
• FOLIADA MIUDIÑA: Organizamos festas que poñen en valor o barrio de Monte Alto… gústanos celebrar e compartir a diversión con todas as familias e a veciñanza. Vendemos rifas a 1€ para facer sorteos de produtos doados polos comerciantes do barrio. Esta festa soe ter lugar en maio.

Moitas grazas pola vosa atención, se tedes algunha consulta podédela facer no correo electrónico apatitongo@gmail.com. Estaremos encantadas de escoitar e responder.

 

 

 

 

 

 

Moitas grazas!